📖 3 верасня 1990 года ў Мінску памёр пісьменнік, перакладык, адзін з заснавальнікаў БНФ і ўраджэнец Брэстчыны — Міхась Дубянецкі. Нарадзіўся 4 сакавіка 1927 года ў вёсцы Востраў (сёння 🏹 Пінскі раён Брэсцкай вобласці). Вучыўся ў польскай сямігадовай школе ў Востраве, у 1938–1939 гадах – у гімназіі Познані. У 1944 годзе скончыў настаўніцкія курсы ў Пінску і працаваў настаўнікам пачатковых класаў. З 1961 года працаваў рэдактарам у выдавецтве «Беларусь», затым галоўным рэдактарам «Ураджаю». У 1975–1979 гадах быў намеснікам галоўнага рэдактара Беларускай Савецкай Энцыклапедыі, а з 1979 да 1986 года — дырэктарам выдавецтва «Мастацкая літаратура». Стаяў ля вытокаў шматтомных выданняў нацыянальнай літаратуры і фальклору, спрыяў выданню твораў беларускіх класікаў і сучасных аўтараў. У 1982 годзе дабіўся выдання чатырохтомнага збору Васіля Быкава, уключыўшы ў яго раней забароненую аповесць «Мёртвым не баліць». Напісаў дакументальнае эсэ «Злое вогнішча» пра гісторыю гэтага выдання, а таксама мемуары і артыкулы, апублікаваныя ў беларускім і замежным друку. У 1980-х гадах стаў адным з пачынальнікаў нацыянальна-дэмакратычнага руху ў Беларусі. У 1988 годзе разам з Зянонам Пазняком і Аляксандрам Лукашуком заснаваў «Камітэт-58», які займаўся расследаваннем сталінскіх рэпрэсій. Быў членам Грамадскай рады таварыства «Мартыралог Беларусі» і ўваходзіў у Аргкамітэт Беларускага народнага фронту «Адраджэньне», створаны ў кастрычніку 1988 года. У 1989 годзе на ўстаноўчым з’ездзе ў Вільні абраны сябрам Сойму БНФ. Пахаваны на Паўночных могілках.