🔫 28 жніўня 2015 года ў вайсковым шпіталі Запарожжа памёр беларускі дабраахвотнік ва Украіне і ураджэнец 🏹 Брэста Алесь Чаркашын. Нарадзіўся 27 верасня 1982 года ў горадзе над Бугам. Актыўна ўдзельнічаў у нацыянальным руху Беларусі. Быў членам спартыўна-патрыятычнай арганізацыі «Край», актывістам руху «Зубр». З 2009 года — у арганізацыі «Беларуская хрысціянская дэмакратыя», стаў старшынёй Брэсцкага гарадскога аддзялення БХД. Быў удзельнікам Плошчы 2010. Вучыўся ў Таўрычаскім хрысціянскім інстытуце ва ўкраінскім Херсоне. У 2014 годзе добраахвотнікам уступіў у шэрагі Добраахвотніцкага Украінскага Корпусу «Правы Сектар», быў байцом Тактычнай групы «Беларусь», што ўдзельнічала ў АТА на усходзе Украіны. Пазыўны «Тарас». Удзельнічаў у баях за Данецкі аэрапорт, у пасёлку Пяскі, у раёне горада Данецк Атрымаў цяжкія раненні ў баі з прарасійскімі тэрарыстамі 10 жніўня 2015 года паблізу вёскі Белая Камянка Тэльманаўскага раёна Данецкай вобласці. Памёр у шпіталі Запарожжа. Пахаваны ў вёсцы Камяніца Жыравецкая Брэсцкага раёна. Алесь выдатна граў на гітары. У сеціве засталося шмат аўтарскіх трэкаў і песен на вершы беларускіх класікаў, якія выконвае брэстчанін.