📚 24 жніўня 1999 года памёр беларускі літаратуразнаўца і ўраджэнец Брэстчыны — Аляксей Гардзіцкі. Нарадзіўся 5 траўня 1934 года ў вёсцы Пугачова (цяпер у межах 🏹 Брэста). Скончыў аддзяленне беларускай мовы і літаратуры Брэсцкага педагагічнага інстытута (1956). Працаваў завучам дзіцячага дома ў 🪷 Мікашэвічах, сакратаром райкама камсамола, а таксама журналістам на Брэстчыне. У 1959–1962 гадах вучыўся ў аспірантуры, затым працаваў навуковым супрацоўнікам Інстытута літаратуры АН БССР. Быў старшым рэдактарам Дзяржкамдруку пры Саўміне БССР. З 1972 года — літаратурны кансультант Саюза пісьменнікаў БССР. У 1970 годзе стаў яго сябрам. З канца 1950-х гадоў актыўна выступаў у прэсе з рэцэнзіямі і артыкуламі пра беларускую літаратуру. Аўтар кніг «Дыялогі» (1968), «Сустрэчы» (1972), «Зразумець як сваё» (1977), «Вачыма сяброў» (1977), «Сябрына» (1986), «Гутаркі» (1988), а таксама літаратуразнаўчай працы «Пра майстэрства дэталі» (1969) і брашуры пра Івана Шамякіна (1971). Выступаў таксама як аўтар празаічных мініяцюр і літаратурных эцюдаў. Складальнік зборніка «Беларускія савецкія паэты» (Тбілісі, 1978) і біяграфічных даведнікаў «Пісьменнікі савецкай Беларусі» (1981) і «Беларускія пісьменнікі: 1917—1990» (1994). Пахаваны на могілках у Камяніцы-Жыравецкай.