⚗️21 жніўня 1949 года ў вёсцы Аляксейкі (сёння 🌿 Івацэвіцкі раён Брэсцкай вобласці) нарадзіўся беларускі навукоўца Сцяпан Пясецкі. У 1971 годзе скончыў Беларускі тэхналагічны інстытут імя С. М. Кірава. Пасля вучобы працаваў у Інстытуце механікі металапалімерных сістэм НАН Беларусі. З 1992 года загадваў лабараторыяй, а з 2004-га — аддзелам. Сцяпан Пясецкі даследаваў палімеры і кампазіцыйныя матэрыялы. Ён зрабіў значны ўнёсак у развіццё тэхналогій іх атрымання і перапрацоўкі, вынайшаў больш за 150 марак палімерных матэрыялаў для машынабудавання, электратэхнічнай прамысловасці і чыгуначнага транспарту. У 1992 годзе стаў доктарам тэхнічных навук, у 2000-м — прафесарам, а ў 2014-м — членам-карэспандэнтам Нацыянальнай акадэміі навук Беларусі. З 2015 года быў галоўным рэдактарам міжнароднага навукова-тэхнічнага часопіса «Палімерныя матэрыялы і тэхналогіі». Памёр Сцяпан Пясецкі 8 красавіка 2020 года.