🧺 19 жніўня 2020 года ў Мінскім вайсковым шпіталі сканаў застрэлены сілавіком у двары 🏹 Брэста Генадзь Шутаў. Вечарам 11 жніўня 2020 года Генадзь Шутаў і Аляксандр Кардзюкоў разам апынуліся на вуліцы Маскоўскай у Брэсце. Недалёка ад гэтага месца пачалі збірацца людзі. Вечар скончыўся трагічна: Генадзь Шутаў быў смяротна паранены. Следчыя сцвярджалі, што Шутаў і яго сябар Аляксандр Кардзюкоў з арматурай напалі на міліцыянтаў у адным з гарадскіх двароў. Таму сілавікам прыйшлося прымяніць зброю. Але на запісе з камеры на пад'ездзе ніякага нападу з арматурай няма: Шутаву стрэлілі наўпрост у патыліцу, калі ён павярнуўся да сілавіка ў цывільным спіной. Медыкі спрабавалі выратаваць ягонае жыццё, але ён памёр ў Мінскім вайсковым шпіталі. Пахавалі Генадзя на могілках недалёка ад яго роднай 🪷 Жабінкі 24 жніўня таго ж года. Генадзь працаваў кіроўцам вялікагрузных аўтамабіляў, быў байкерам, вёў актыўны лад жыцця. У Шутава засталося пяцёра дзяцей. Гісторыя на гэтым не скончылася. 25 лютага 2021 года суд прызнаў Шутава пасмяротна вінаватым у супраціве вайскоўцу з ужываннем гвалту. Яго сябар і адзіны сведка забойства Аляксандр Кардзюкоў быў асуджаны за тое ж самае на 10 гадоў калоніі.