🦊 👨🦱 17 жніўня 1631 года не стала вялікалітоўскага дзяржаўнага і ваеннага дзеяча, ураджэнца Брэстчыны Крыштафа Міхала Сапегі. Нарадзіўся 10 жніўня 1607 года ў 🌹Ружанах (сёння 🐍 Пружанскі раён Брэсцкай вобласці). Паходзіў з чарэйска-ружанскай лініі магнацкага роду Сапегаў герба «Ліс». Яго бацькамі былі канцлер вялікі літоўскі Леў Сапега і Гальшка Радзівіл. Крыштаф Міхал навучаўся ў Віленскай акадэміі, а затым разам з братам Казімірам Львом працягнуў адукацыю ў Мюнхене і Інгальштаце. У 1624 годзе захварэў на сухоты і вярнуўся дадому, аднак пасля лячэння зноў выехаў за мяжу. Вучыўся ў Лёвенскім універсітэце, наведаў Брусель, Балонню і Падую. У 1629 і 1630 гадах яго абіралі паслом на соймы. З 1630 года займаў пасаду падстолія вялікага літоўскага, а з 1631-га — пісара вялікага літоўскага. Сапега таксама быў аўтарам працы «Theses politicae ex Aristotelis libris de republica», выдадзенай у Лёване ў 1627 годзе. Памёр ад сухотаў ва ўзросце 24 гадоў.