Սեպտեմբերի 27-ին տեղի ունեցավ Մինսկի հայորդյաց տան նոր ուսումնական տարվա բացումը: Միջոցառումը համախմբել էր աշակերտներին, ուսուցիչներին, ծնողներին և համայնքի բարեկամներին՝ մեկ ընդհանուր գաղափարի շուրջ, որն է՝ հոգևոր կրթությունը, ազգային անանց արժեքների պահպանությունը, հայրենասիրությունը: Առանձնահատուկ հուզմունքով էր լցված օրն այն փոքրիկների համար, ովքեր առաջին անգամ ոտք դրեցին դպրոց։ Միջոցառումն սկսվեց Տեր Սարգիս քահանա Չոփուրյանի օրհնության խոսքով և միասնական Տերունական աղոթքով: Տեր հայրը հաջողություններ մաղթեց սաներին նոր ուսումնական տարում՝ նշելով, որ յուրաքանչյուր ստացած գիտելիք մեկ քայլով մոտեցնում է հզոր ու անպարտելի հայրենիք ունենալուն: Միջոցառման մասնակիցները մեկ րոպե լռությամբ հարգեցին այն հերոսների հիշատակը, ովքեր իրենց կյանքը նվիրեցին հայրենիքի պաշտպանությանը: Կրթօջախի սաներին ողջունեց նաև Մինսկի «Հայաստան» մշակութալուսավորչական միության նախագահ Գեորգի Եղիազարյանը, ապա սաները հանդես եկան հայրենաշունչ ասմունքով ու երգով: