✝️Ավետարանի ամենախորիմաստ խոսքերից մեկը Տիրոջ հարցն է. «Ապա ուրեմն ինչպէ՞ս չէք հասկանում» (Մարկ. 8.21)։ Այս հարցը Քրիստոս ուղղում է Իր աշակերտներին, բայց այն նաև ուղղված է մեզանից յուրաքանչյուրին։ Փարիսեցիները Հիսուսից նշան էին պահանջում։ Նրանք հրաշքներ էին տեսել, լսել էին Նրա խոսքը, բայց դարձյալ պահանջում էին նոր նշան։ Նրանց խնդիրը նշանի պակասը չէր, այլ՝ հավատի պակասը։ Մարդը կարող է իր աչքով տեսնել հրաշքը, բայց եթե սիրտը փակ է Աստծո առաջ, նույնիսկ հրաշքը չի կարող նրան հավատացյալ դարձնել։ Եվ այստեղ է Ավետարանի կարևոր դասը. մարդու թերահավատությունը հաճախ ծնվում է ոչ թե այն պատճառով, որ Աստված քիչ բան է արել, այլ այն պատճառով, որ մենք արագ մոռանում ենք Նրա արածը։ Տեր Վրթանես քհն. Բաղալյան